त्या’ वादग्रस्त प्रमुखाच्या ‘चाऊ-माऊ’ची अखेर चौकशी होणार का?

संगमेश्वर – तालुक्यातील एका महत्त्वाच्या शासकीय कार्यालयात वरिष्ठ अधिकारी विरुद्ध कनिष्ठ कर्मचारी यांच्यात पेटलेला ‘चाऊ-माऊ’चा (आर्थिक तडजोडीचा) वाद दिवसेंदिवस अधिकच चिघळत चालला आहे. एका प्रामाणिक अधिकाऱ्याने या भ्रष्ट कारभाराचे वास्तव थेट शासनासमोर मांडल्यानंतर आता या प्रकरणाची ‘खरंच निष्पक्ष चौकशी होणार का?’ असा सवाल तालुकाभरातून विचारला जात आहे.

​कामापेक्षा ‘टेबल खालच्या’ देवाणघेवाणीला प्राधान्य देणाऱ्या या कार्यालयाची प्रतिमा पार धुळीस मिळाली असून, सर्वसामान्य नागरिक पुरते हैराण झाले आहेत.

​ वाद निर्माण करण्याची जुनीच ‘सवय’!

​कार्यालयाची धुरा सांभाळणारे हे प्रमुख अधिकारी आपल्या मनमानी कारभारासाठी आणि वादग्रस्त विधानांसाठी यापूर्वीही चांगलेच चर्चेत राहिले आहेत.

शिक्षणाचे धडे देणाऱ्यांना ‘मेंढरं’ची उपमा!

काही काळापूर्वी याच महाशयांनी समाजाला शिक्षणाचे धडे देणाऱ्या कर्मचाऱ्यांचा चक्क ‘मेंढरं’ असा उल्लेख करून त्यांचा तीव्र अवमान केला होता. त्यांच्या या वक्तव्यामुळे मोठा वाद निर्माण झाला होता. वरिष्ठांच्या अशा बेताल आणि अपमानकारक वक्तव्यातून त्यांची हुकूमशाही वृत्ती वेळोवेळी समोर आली असून, कर्मचाऱ्यांमध्ये त्यांच्याविषयी कमालीचा असंतोष खदखदत आहे.

चौकशीच्या नावाखाली कागदी घोडे नाचणार की धडक कारवाई ?
​

एका प्रामाणिक अधिकाऱ्याने शासनाकडे केलेल्या पुराव्यानिशी तक्रारीमुळे आणि एका कर्मचाऱ्याच्या राजीनाम्याच्या पवित्र्यानंतर आता वरिष्ठ अधिकारी आणि ‘त्या’ वादग्रस्त प्रमुखाचे धाबे दणाणले आहेत. परवाच्या दिवशी कार्यालयात झालेली खडाजंगी आणि रोजच्या ‘चाऊ-माऊ’च्या चर्चांमुळे प्रशासनाची मोठी नाचक्की झाली आहे.

​त्यामुळे आता शासनाकडून या संपूर्ण प्रकरणाची विशेष चौकशी समिती नेमली जाणार का? माजी सैनिकाने लावलेल्या भ्रष्टाचाराच्या आरोपांचे सत्य बाहेर येणार का? की नेहमीप्रमाणे ‘आपापसात’ प्रकरण दाबून टाकण्याचा प्रयत्न होणार?
​
याकडे सर्वसामान्य जनतेचे आणि कर्मचाऱ्यांचे डोळे लागले आहेत. जर या वादग्रस्त अधिकाऱ्यावर तातडीने कारवाई झाली नाही, तर या विरोधात मोठा जनक्षोभ उसळण्याची शक्यता वर्तवली जात आहे.