ठाण्याच्या पोलीस आयुक्तांचेच व्हॉट्सॲप हॅक! सायबर गुन्हेगारांचे धाडस वाढले; स्टेटसवर १२ अश्लील व्हिडिओ अपलोड
आयुक्त आशुतोष डुंबरे यांच्या व्हॉट्सॲप खात्याचा अनधिकृत ताबा; दोन तासांच्या प्रयत्नांनंतर आक्षेपार्ह चित्रफिती हटविण्यात यश, सायबर पोलीस ठाण्यात अज्ञाताविरोधात गुन्हा दाखल

ठाणे : सायबर गुन्हेगारांचे धाडस किती वाढले आहे, याचा प्रत्यय ठाण्यातील एका धक्कादायक घटनेतून आला आहे. सर्वसामान्य नागरिकांना सायबर सुरक्षेबाबत मार्गदर्शन करणाऱ्या पोलीस यंत्रणेतील वरिष्ठ अधिकाऱ्यालाच सायबर गुन्हेगारांनी लक्ष्य केले आहे. ठाण्याचे पोलीस आयुक्त आशुतोष डुंबरे यांचे अधिकृत व्हॉट्सॲप खाते हॅक करून त्यांच्या स्टेटसवर तब्बल १२ अश्लील व्हिडिओ अपलोड करण्यात आल्याचा प्रकार मंगळवारी उघडकीस आला. या घटनेमुळे पोलीस दलात मोठी खळबळ उडाली आहे.
मिळालेल्या माहितीनुसार, मंगळवारी सायंकाळी पावणेपाचच्या सुमारास आयुक्तांच्या व्हॉट्सॲप खात्यावर संशयास्पद हालचाली सुरू झाल्या. अज्ञात सायबर गुन्हेगाराने खात्याचा अनधिकृत ताबा मिळवत स्टेटसवर अश्लील चित्रफिती अपलोड केल्या. हा प्रकार लक्षात येताच पोलीस यंत्रणा तातडीने सक्रिय झाली. गुन्हे अन्वेषण शाखा आणि सायबर कक्षाने त्वरित तांत्रिक तपास सुरू केला. सुमारे दोन तासांच्या प्रयत्नांनंतर सायंकाळी सहाच्या सुमारास सर्व आक्षेपार्ह चित्रफिती हटविण्यात यश आले.
या प्रकरणाची गंभीर दखल घेत ठाणे सायबर पोलीस ठाण्यात अज्ञात व्यक्तीविरोधात गुन्हा दाखल करण्यात आला आहे. पोलीस उपायुक्त पराग मणेरा यांनी या घटनेला दुजोरा दिला असून, संबंधित सायबर गुन्हेगाराचा शोध घेण्यासाठी तपास सुरू असल्याचे स्पष्ट केले आहे.
नागरिकांनी व्हिडिओ फॉरवर्ड करू नयेत!
या घटनेच्या पार्श्वभूमीवर ठाणे पोलिसांनी नागरिकांना विशेष खबरदारी घेण्याचे आवाहन केले आहे. संबंधित आक्षेपार्ह चित्रफितींवर विश्वास ठेवू नये, त्या डाउनलोड अथवा इतरांना फॉरवर्ड करू नयेत. कोणत्याही संशयास्पद लिंकवर क्लिक करू नये तसेच या घटनेबाबत अफवा पसरवू नयेत, असे आवाहन वरिष्ठ पोलीस निरीक्षक तथा जनसंपर्क अधिकारी शैलेश साळवी यांनी केले आहे.
व्हॉट्सॲप सुरक्षित ठेवण्यासाठी घ्या ही खबरदारी
व्हॉट्सॲप खाते सुरक्षित ठेवण्यासाठी टू-स्टेप व्हेरिफिकेशन सुरू करणे, सहा अंकी व्हेरिफिकेशन पिन कोणालाही न सांगणे, अनोळखी लिंकपासून दूर राहणे आणि व्हॉट्सॲपच्या ‘Linked Devices’ विभागातून अनोळखी उपकरणांची जोडणी तपासून ती काढून टाकणे आवश्यक आहे. तसेच संशयास्पद ओटीपी किंवा व्हेरिफिकेशन कोड कोणाशीही शेअर करू नये.
पोलीस आयुक्तांचेच खाते हॅक झाल्याने सायबर सुरक्षेचा प्रश्न पुन्हा ऐरणीवर आला आहे. डिजिटल जगात कोणतेही खाते पूर्णपणे सुरक्षित असल्याचे गृहीत धरता येत नाही, हे या घटनेने अधोरेखित केले आहे.



