आमदार किरण सामंत यांच्या पुढाकाराने संगमेश्वरचे डायलिसिस सेंटर पुन्हा सुरू; रुग्णांना मोठा दिलासा!

रत्नागिरी – संगमेश्वर येथील डायलिसिस सेंटर पुन्हा सुरू झाले असून, काही काळ खंडित झालेली डायलिसिस सेवा पूर्ववत सुरू झाल्याने तालुक्यातील मूत्रपिंडाच्या आजाराने त्रस्त असलेल्या रुग्णांना मोठा दिलासा मिळाला आहे. आमदार किरण सामंत यांनी यासाठी पुढाकार घेतल्याने सेंटर पुन्हा सुरू होण्याचा मार्ग मोकळा झाला. स्थानिक पातळीवरच डायलिसिसची सुविधा उपलब्ध झाल्याने रुग्ण आणि त्यांच्या नातेवाईकांमधून समाधान व्यक्त होत आहे.

संगमेश्वर तालुक्यातील डायलिसिसची गरज असलेल्या रुग्णांसाठी हे सेंटर अत्यंत महत्त्वाचे आहे. नियमित डायलिसिस करावे लागणाऱ्या रुग्णांना आठवड्यातून अनेक वेळा उपचार घ्यावे लागतात. यासाठी रत्नागिरी किंवा अन्य ठिकाणी जावे लागत असल्याने प्रवासाचा खर्च, वेळ आणि रुग्णांच्या प्रकृतीवरील ताण वाढत होता. काही काळ सेंटरची सेवा खंडित झाल्याने रुग्णांची मोठी गैरसोय झाली होती.

या पार्श्वभूमीवर आमदार किरण सामंत यांनी सेंटरची सेवा पुन्हा सुरू करण्यासाठी पुढाकार घेतला. त्यांच्या प्रयत्नांमुळे डायलिसिस सेंटर पुन्हा कार्यान्वित झाले असून रुग्णांना पूर्वीप्रमाणे स्थानिक पातळीवर उपचार घेणे शक्य झाले आहे.

दरम्यान, संगमेश्वर येथील डायलिसिस सेंटर सुरू असून रुग्णांना नियमित सेवा उपलब्ध करून दिली जात आहे, अशी माहिती वैद्यकीय अधिकारी यांनी दिली. रुग्णांना उपचारासाठी अन्य ठिकाणी जाण्याची वेळ येऊ नये, यासाठी सेंटरची सेवा सुरळीत सुरू ठेवण्यावर भर दिला जात असल्याचेही त्यांनी स्पष्ट केले.

जिल्ह्यातील काही ठिकाणी डायलिसिस सेंटरच्या सेवा खंडित होण्याच्या घटना समोर येत असताना संगमेश्वरचे सेंटर पुन्हा सुरू झाल्याने रुग्णांना दिलासा मिळाला आहे. मात्र, ही सुविधा केवळ सुरू होणे पुरेसे नसून ती नियमित आणि अखंडित सुरू राहणे गरजेचे आहे. आर्थिकदृष्ट्या आणि शारीरिकदृष्ट्या अडचणीत असलेल्या डायलिसिसच्या रुग्णांसाठी ही सुविधा जीवनदायी ठरत असल्याने तिचे सातत्य कायम राखावे, अशी अपेक्षा रुग्ण व नातेवाईकांकडून व्यक्त होत आहे.