चिपळूणमध्ये मनसेची ताकद वाढली! ; राष्ट्रवादी काँग्रेस आणि भाजपच्या असंख्य कार्यकर्त्यांचा महाराष्ट्र नवनिर्माण सेनेत प्रवेश

आरवली  : चिपळूण तालुक्यात महाराष्ट्र नवनिर्माण सेनेने आपली संघटनात्मक ताकद वाढविण्याच्या दृष्टीने महत्त्वाचे पाऊल टाकले आहे. चिपळूण शहरातील हॉटेल साईशा येथे आयोजित पक्षप्रवेश सोहळ्यात राष्ट्रवादी काँग्रेस आणि भारतीय जनता पक्षाच्या असंख्य कार्यकर्त्यांनी महाराष्ट्र नवनिर्माण सेनेत प्रवेश केला. मनसेचे जिल्हाध्यक्ष जितेंद्र चव्हाण यांच्या प्रमुख उपस्थितीत पार पडलेल्या या सोहळ्यामुळे तालुक्यातील राजकीय वर्तुळात लक्ष वेधले गेले आहे.

चिपळूण तालुक्यातील दळवटणे, वालोपे, निरबाडे आणि वालोटी या परिसरातील कार्यकर्त्यांनी मनसेमध्ये प्रवेश केला. विविध राजकीय पक्षांत कार्यरत असलेल्या कार्यकर्त्यांनी मनसेचा झेंडा हाती घेतल्याने तालुक्यात पक्षसंघटना विस्ताराच्या दृष्टीने या प्रवेश सोहळ्याला महत्त्व प्राप्त झाले आहे.

शिवप्रतिमेला अभिवादन करून सोहळ्याची सुरुवात

कार्यक्रमाच्या प्रारंभी शिवप्रतिमेला पुष्पहार अर्पण करून अभिवादन करण्यात आले. त्यानंतर उपस्थित मान्यवरांच्या साक्षीने पक्षप्रवेश सोहळा उत्साहात पार पडला. प्रवेशकर्त्यांचे स्वागत करून त्यांना पक्षाच्या माध्यमातून सामाजिक व राजकीय क्षेत्रात काम करण्यासाठी प्रोत्साहित करण्यात आले.

यावेळी कीर्तनकार ह.भ.प. तांबिटकर महाराज, प्राध्यापक टेरवकर तसेच मनसेच्या पदाधिकाऱ्यांनी उपस्थितांना मार्गदर्शन केले. पक्षप्रवेश केलेल्या कार्यकर्त्यांना संबोधित करताना जिल्हाध्यक्ष जितेंद्र चव्हाण यांनी त्यांना सर्वतोपरी सहकार्य करण्याचे आश्वासन दिले. नव्याने पक्षात दाखल झालेल्या कार्यकर्त्यांना संघटनात्मक कामात सहभागी करून घेण्याचा विश्वासही त्यांनी व्यक्त केला.

मनसे पदाधिकाऱ्यांची उपस्थिती

या पक्षप्रवेश सोहळ्याला माथाडी कामगार सेनेचे सरचिटणीस रविकांत काणेकर, शेतकरी सेनेचे जिल्हा सचिव जितेंद्र महाडिक, गुहागर तालुकाध्यक्ष सुनील हळदणकर, वाहतूक सेनेचे तालुकाध्यक्ष मिलिंद कदम, मनसेचे माजी तालुका प्रवक्ते संदेश साळवी, महिला उपाध्यक्षा स्मिता पावसकर यांच्यासह अन्य पदाधिकारी व कार्यकर्ते उपस्थित होते.

कार्यक्रमाचे सूत्रसंचालन आणि आभार प्रदर्शन ज्येष्ठ निवेदक शहीदभाई खेरटकर यांनी केले. राष्ट्रगीताने कार्यक्रमाची सांगता झाली.

चिपळूण तालुक्यातील विविध गावांमधून कार्यकर्त्यांनी मनसेत प्रवेश केल्याने पक्षाच्या स्थानिक संघटनात्मक विस्ताराला बळ मिळण्याची शक्यता व्यक्त होत आहे.