आमदार शेखर निकम यांच्या हस्ते नवनिर्वाचित डॉक्टर शुभम कोकरे यांचा सत्कार!

सावर्डे : ग्रामीण भागातील प्रतिकूल परिस्थितीवर मात करीत जिद्द, चिकाटी आणि मेहनतीच्या जोरावर बी.ए.एम.एस. (BAMS) ही वैद्यकीय पदवी संपादन करून डॉक्टर झालेल्या तळवडे धनगरवाडी येथील शुभम वैशाली धोंडीराम कोकरे यांचा चिपळूण-संगमेश्वर विधानसभा मतदारसंघाचे आमदार मा. श्री. शेखर निकम यांच्या हस्ते सत्कार करण्यात आला.

यावेळी शुभम कोकरे यांच्या वैद्यकीय क्षेत्रातील यशाबद्दल आमदार शेखर निकम यांनी त्यांचे अभिनंदन करून पुढील वैद्यकीय वाटचालीसाठी शुभेच्छा दिल्या. ग्रामीण भागातील सामान्य कुटुंबातून पुढे येत वैद्यकीय शिक्षण पूर्ण करणे ही अभिमानास्पद बाब असल्याचे यावेळी नमूद करण्यात आले.

या सत्कार समारंभाला जिल्हा परिषद सदस्या श्रीमती पूजा निकम, अनिरुद्ध निकम, खरी लोकजागृतीचे मुख्य संपादक संतोष विठ्ठल येडगे, रत्नागिरी जिल्हा नियोजन समितीचे माजी सदस्य तुकाराम येडगे यांच्यासह मान्यवर उपस्थित होते.

शुभम कोकरे यांनी महाराष्ट्र आरोग्य विज्ञान विद्यापीठ, नाशिक यांच्या अंतर्गत बी.ए.एम.एस. पदवी यशस्वीरीत्या पूर्ण केली आहे. सन २०२१ मध्ये लोकनेते राजारामबापू पाटील आयुर्वेदिक मेडिकल कॉलेज, ईश्वरपूर, जिल्हा सांगली येथे त्यांनी वैद्यकीय शिक्षणासाठी प्रवेश घेतला होता. सातत्यपूर्ण अभ्यास आणि कठोर परिश्रमाच्या जोरावर त्यांनी डॉक्टर होण्याचे स्वप्न पूर्ण केले.

शुभम यांचे प्राथमिक शिक्षण जिल्हा परिषद प्राथमिक शाळा, कुटरे येथे, तर माध्यमिक शिक्षण गोविंदराव निकम विद्यालय, सावर्डे येथे झाले. त्यानंतर खेड येथील श्रीमान चंदुलाल शेठ हायस्कूल व ज्युनिअर कॉलेजमध्ये त्यांनी अकरावी-बारावीचे शिक्षण पूर्ण केले. घरी राहून NEET परीक्षेची तयारी करीत त्यांनी वैद्यकीय शिक्षणासाठी प्रवेश मिळविला.

त्यांचे वडील धोंडीराम बाबू कोकरे हे कुटरे येथील जे. वाय. शिर्के हायस्कूलमध्ये शिपाई म्हणून कार्यरत असून आई वैशाली धोंडीराम कोकरे या गृहिणी आहेत. आई-वडिलांच्या कष्टाचे आणि त्यागाचे चीज करीत शुभम यांनी डॉक्टर होण्याचे स्वप्न साकार केले आहे.

आमदार शेखर निकम यांच्या हस्ते झालेल्या या सत्कारामुळे शुभम कोकरे यांच्या यशाचा आनंद द्विगुणित झाला असून तळवडे गावासह संपूर्ण परिसरातून त्यांच्यावर अभिनंदनाचा वर्षाव होत आहे. सामान्य कुटुंबातील विद्यार्थ्याने जिद्द आणि मेहनतीच्या बळावर मिळविलेले हे यश ग्रामीण भागातील विद्यार्थ्यांसाठी निश्चितच प्रेरणादायी ठरणारे आहे.